२०६६ मंसिर १२ - उपप्रधानमन्त्री सुजाता कोइरालाले वयोवृद्ध पिता गिरिजाप्रसाद कोइरालाको स्वास्थ्य उपचारको सिलसिलामा सिंगापुरमा रहँदा होटलमा अत्यधिक खर्च गरिन् भन्ने आरोप लगाइएको छ । तर यसमा त्यस्तोविधि कुनै वास्तविकता अन्तरनिहित छैन । हामीले अनावश्यक होहल्लामा ध्यान दिनुहुन्न । यसको परिपुष्ट प्रमाणका रूपमा तल केही प्रख्यात होटलका सत्यतथ्य विवरण प्रस्तुत गरिएको छ ।

विश्वमा अनेकन ठूलठूला होटल विद्यमान छन्, जहाँ द रोयल पेन्थहाउस सुइटदेखि लिएर भिल्ला कोपोलासम्मका महङ्गा कोठा उपलब्ध हुन्छन् । उदाहरणका लागि, जेनेभाको 'प्रेसिडेन्ट विल्सन होटल'मा एक रातको पैंसठ्ठी हजार युएस डलर पर्छ भने 'होटल कालाडी भोल्प' पोर्टाेसर्भोमा पैंतालीस हजार युएस डलर । र न्युयोर्कको 'फोर सिजन्स होटल'मा रातको पैंतीस हजार युएस डलरको कोठा पाइन्छ भने रोमको 'वेस्टिन एक्सेल्सियर होटल'मा एकतीस हजार रातभरिमा हुनजान्छ ।

यस्तै टोक्योको 'रिट्ज कार्लटन होटल'मा एकरातको पच्चीस हजार युएस डलरको बिल आउँछ भने 'द एटलान्टिस होटल' बाहामाजमा बाइस हजार युएस डलर । अनि पेरिसको 'पार्क ह्यात मेन्डोम होटल'मा रातको बीस हजार युएस डलर तिर्नुपर्छ भने 'बुर्ज अल अस्व होटल' दुबईमा उन्नाइस हजार सात सय युएस डलर । यही प्रकारले जेनेभाको 'ले रिचमन्ड होटल'मा एकरातमा अठार हजार नौ सय युएस डलर तिर्नुपर्छ भने 'द रिट्ज कार्लटन होटल' मस्कोमा सोह्र हजार पाँच सय युएस डलर । मलाई त यो फेहरिस्त हेरेर अचम्मै लाग्छ, यी कस्ता होटल हुन् हँ ?

मैले गल्फकोर्स, हर्सराइडिङ, जिम, बार, डान्सिङ रूम, स्विमिङ पुल, क्यासिनो आदि लक्जरीयुक्त होटलबारे थोरबहुत सुनेको थिएँ । आफूलाई उपभोगको स्तरसम्म भने पुर्‍याउनसकेको छैन । आफ्नो स्तरको कुरा हो । के गर्ने ? जे होस्, त्यहाँ मसाज, फेसियल, सौनावाथ, जकुजीजस्ता 'स्पा'को परम सुविधा पनि हुने गर्छ रे । यत्ति हो । योभन्दा बढी मेरो होटलसम्बन्धी जानकारी छैन । कुन्नि, माथि उल्लिखित हजारौं-हजार युएस डलर पर्ने होटलमा कस्तो राजषी सुखसयल हुने गर्छ । मेरो कल्पना पनि त्यहाँसम्म पुग्न असमर्थ छ । म कुनै अरबी सेख अथवा सम्पन्न कर्पोरेट जगतको मालिक अथवा ड्रग माफिया डन अथवा भ्रष्टतम शासक होइन । कृपया, मलाई क्षमा गर्नाेस् ।

यस हिसाबले उपप्रधानमन्त्री सुजाता कोइरालाले होटलमा विलासिताको प्रदर्शन गरेर त्यस्तो के खर्च गरिन् र ? दिन -अथवा रात) को चौध सय युएस डलर नै त हो । यसको जम्माजम्मी एक लाख पाँच हजार रुपैयाँ हुन्छ । तपाईं अंक मिलान गरेर हेर्न सक्नुहुन्छ । के बेसी भयो ? एकरातमा पचासौं लाखसम्म पर्ने भिल्ला कापोला, बि्रज सुइट, स्काइभिल्ला, द रोयल सुइट, दल पेन्थहाउस सुइट, द इम्पिरियल सुइट, द रिट्ज कार्लटन सुइट, द रोयल पेन्थहाउस सुइट, वार्नर पेन्थहाउस सुइट, द रोयल आर्मलेडर सुइट, द प्रेसिडेन्सियल सुइट जस्ताको तुलनामा यो केही पनि होइन ।

सुजाता कोइरालाले होटलमा धेरै नै कम व्यय गरेकी छिन् । मेरो विचारमा उनी मितव्ययी हुन् । मितव्ययी सुजाता कोइराला । त्यसकारण होटलमा बेसी खर्च गरिन् भन्ने मिथ्या आरोपबाट विचरा सुजाता कोइरालालाई जतिसक्दो चाँडो मुक्त गर्नुपर्छ भन्ने मेरो सविनय निवेदन हो ।